ILOILO CITY– Suportado sang Presidente sang Liga ng mga Barangay sa syudad sang Iloilo, ang lihok sang mga punong barangay sa distrito sang La Paz, may kaangtanan sa condemnation letter batok sa pinuno sang Public Safety and Transportation Management Office, sa pagkadakop sang barangay patrol nga kuntani magadala sang pasyente sa animal bite center.
Sa interview sang Bombo Radyo kay Liga ng mga Barangay President Irene Ong, iya ginpahayag nga suportado niya ang lihok sang kaangay niya nga mga punong barangay.
Suno kay Ong, ang mga barangay patrol ang ginagamit sang tagsa ka mga barangay sa syudad kun kinahanglanon.
Pahayag pa ni Ong, kuntani ginwarningan lang anay ang driver sang amo nga patrol kag wala lang gindakop bangud wala sang plaka.
Dugang pa ni Ong, kalabanan sang mga barangay patrol ang wala sang papeles kag ang amo nga patrol ang ginagamit sa tion sang emerhensya kag nagasunod man sila nga sa service road mahimo makalabay.
