Nagpadala sang sulat ang Liga ng mga Barangay – Iloilo City Chapter kay Iloilo Governor Arthur Toto Defensor Jr. agud ipahayag ang ila kabalaka tuhoy sa mga Facebook post ni Mr. Jose Nereo Lujan, head sang Public Information and Community Affairs Office (PICAO) sang Iloilo Provincial Government.
Suno sa city officials, nagapakita sang “bitter hostility” batok sa Iloilo City Government kag kay Mayor Raisa Treñas ang mga post ni Lujan.
Ang nasambit nga sulat ang pirmado ni Hon. Maria Irene D. Ong, Presiding Officer kag Liga President, kaupod ang mga District President.
Kabahin sa sulat ang pagpahanumdom sang Liga sa madugay na nga maayo nga relasyon sang Iloilo City kag Province of Iloilo kun sa diin pareho lamang nga may handom nga mag-uswag kag maghatag sang maayo nga serbisyo sa mga pumuluyo.
Pahayag pa sang Liga, apisar nga personal Facebook account ni Lujan ang iya ginagamit, mahimo gihapon ini makaapekto sa panan-aw sang publiko sa Provincial Government.
Sandig sa sulat, ang mga post ni Lujan ang wala nagabulig sa pagpaayo sang public service, sa baylo ginakabig sang Liga nga makahalit sa dungog sang Iloilo City Government kag sang mga lider sini.
Bangud sini, nag-apelar ang Liga kay Governor Defensor nga buligan nga mapunggan ang padayon nga tensyon kag indi pagtugutan nga maglala pa ang sitwasyon.
