ILOILO – Nagahimo man sang kaugalingon nga lihok ang Liga ng mga Barangay sa probinsya sang Iloilo agud nga makabulig sa pagtapna sang Novel Coronavirus.
Sa interview sang Bombo Radyo kay Liga ng mga Barangay President Dorothy Paes, iya ginpahayag nga ginatutukan sang tagsa ka barangay council ang information dissemination.
Suno kay Paes, santo sa order nga ginpaguwa sang Department of Interior and Local Government, kutub lang sa Local Government Unit ang ginamandu-an nga magtukod sang Task Force on N-Cov apang indi man mahimo nga magpabaya ang barangay council.
Ginpahayag ni Paes nga may igapanghatag nga campaign materials agud nga mapahangop ang publiko tuhoy sa virus nga halin sa Wuhan, China.
