ILOILO CITY – May mga punong barangay sa syudad sang Iloilo nga nagapangduha-duha man sa pagpabakuna batok sa COVID-19.
Sa interview sang Bombo Radyo kay Calumpang, Molo Punong Barangay Roberto Niño kag spokesperson sang Liga ng mga Barangay sa syudad, iya ginpahayag nga bangud sa nagatuhaw nga mga balita kun sa diin may mga napatay sa iban nga pungsod nga ginapahayag may kaangtanan sa vaccine, indi man mahim-os ang iban nga punong barangay kun safe gid man bala ang bakuna.
Pagpanghangkat ini sa Liga ng mga Barangay suno kay Niño bangud indi nila maengganyo ang mga pumuluyo nga magsuporta sa mass vaccination program kun sila mismo ang wala man sang salig sa bakuna.
Ginpahayag sang natungdan nga kinahanglan man sang mga barangay officials sang dugang nga pag-edukar agud nga mahangpan ang proseso sang vaccine development, safety, efficacy kag iban pa.
Ini ang dapat tutukan suno kay Niño samtang ginahitso man sang Iloilo City Government ang vaccination plan sang syudad.
