Lima ka persona, lakip ang isa ka anay police officer, ang nadakpan sa drug buy-bust operation sang kapulisan sa Barangay Cahaguichican, Pototan, Iloilo, hapon sang Oktubre 14, 2026.
Sa interview sang Bombo radyo kay Pcapt.Ryan Batadlan, Iloilo Police Provincial Office, Provincial Drug Enforcement Team, iya ginpahayag nga nagabug-at sang 415 grams ang suspected shabu nga narekober sa mga suspek, nga may ginabanta nga Standard Drug Price (SDP) nga masobra ₱2.8 milyon.
Ini nga mga arestado amo sanday alyas Garry , 46-anyos; alyas Rolly, 47-anyos, nga anay police officer; alyas Bert , 48-anyos; kag alyas Warren , 23-anyos, nga lunsay residente sang nasambit nga barangay; kag alyas Arnick , 37-anyos, nga residente sang Barangay Cabalabaguan, Mina, Iloilo.
Suno kay Batadlan, duha sa lima ka mga arestado ang ginakabig nga High Value Individuals (HVI), samtang tatlo ang Street-Level Individuals (SLI).
Tatlo ka magagmay nga sachet kag duha ka knot-tied sachet sang suspected shabu ang narekober sa operasyon nga ginkondoktar sang Provincial Drug Enforcement Unit (PDEU) Team 2.
Samtang, detained na ang lima ka mga suspek sa Pototan Municipal Police Station kag natalana nga pasakaan sang kaso bangud sa ginapahayag nga paglapas sa Republic Act 9165 ukon Comprehensive Dangerous Drugs Act of 2002.
Text by: Bombo Jay Panizales
