ILOILO – Lima ka Local Chief Executives sa probinsya sang Iloilo ang ginpadal-an sang show cause order sang Department of the Interior and Local Government matapos napaslawan nga malab-ot ang 80% threshold sa tagtaganay sang Social Amelioration Program.
Ginkumpirma sa Bombo Radyo ni Provincial DILG Officer Teodora Sumagaysay nga nabaton na ni Gov. Arthur Defensor Jr. ang sulat gikan sa DILG central office kag may yara lamang sang 48 hours ang lima ka alkalde agud nga makasabat.
Nakasaad sa sulat suno kay Sumagaysay nga nagakadapat nga magpaathag ang mga alkalde sang Oton, Tigbauan, Alimodian, Tubungan kag Leon kun nga-a wala nalab-ot ang 80% threshold as of Mayo 10 nga deadline.
Ginpahayag man ni Sumagaysay nga si Gov. Defensor mismo ang magapadala sang 2-page show cause order sa lima ka Local Chief Executives kag ang sabat ang ila nga i-address kay Undersecretary Epimaco Densing III.
Nahubalu-an nga una na nga nagguwa nga 11 ka Local Chief Executives sa Western Visayas ang padal-an sang show cause.
