𝗖𝗔𝗟𝗜𝗡𝗢𝗚, 𝗜𝗟𝗢𝗜𝗟𝗢 —Wala pa sa gihapon napapanaog ang lima ka mga bangkay nga napatay sa nagluntad nga engkwentro sa tunga sang Philippine Army kag katapo sang Communist Terrorist Group – New People’s Army (CTG-NPA) sa Barangay Aglonok, Calinog Iloilo.
Sa interview sang Bombo Radyo kay Lt. Col. Vicel Jan Garsuta, commander sang 12th Infantry Batallion, iya ginpahayag nga mabudlay ang alagyan sa lugar ilabi na sa kabukiran, rason nga helicopter ang gamiton kontani sa pagpapanaog sang mga bangkay sang mga rebelde.
Suno kay Garsuta, tuman ka damol ang panganod kag mabaskog ang ulan kon sa diin nakahamtang ang mga bangkay sang rebelde rason nga ginkansela ang operasyon bangud man sa dala sang malain nga tyempo sa amo nga banwa.
Ginpahayag man sini nga bangud sa low visibility kag manubo nga cloud ceiling, isa ka oras nga naglibot-libot sa kahawaan sang Calinog ang helicopter rason man nga wala na lang gindayon ang operasyon.
Nangin kabangdanan man ang malain nga tyempo kon ngaa wala natigayon nga masulod sang militar ang lugar kon sa diin ang mga bangkay.
Kon mangin matawhay naman ang tyempo sa lugar buwas nga adlaw, ginalauman nga mapapanaog na ang mga bangkay kag matigayon nga matumod ang ila nga mga identity.
