Napasakaan na sang kaso ang lima ka mga indibidwal nga ginatudlo responsable sa pagpanggamo sa balay sang tanod sa Zone 1, Sitio Luding, Compania Central sa distrito sang Molo sang Huwebes sang gab-i, Abril 23.
Sa interview sang Bombo Radyo kay Punong Barangay Reynald Hervas sang Compania Central, ginpahayag sini nga duha sa lima ka suspek ang yara na sa kustodiya sang Iloilo City Police Station 4, samtang ang tatlo ang padayon pa nga ginapangita.
Suno sa report, ang mga suspek may yara na nga daan sang nagkalain-lain nga record sa barangay, lakip na ang pagpangransak kag ang iban sa ila ang naangut man sa buy-bust operations.
Ginakabig man nga mga “troublemaker” sa ila baranagay ang mga suspek bangod suno sa opisyal sang barangay, sila ang permi ginahalinan sang kinagamo.
Padayon naman ang pagpakig-angot sang barangay sa mga kapulisan agud mapadasig ang pagkadakop sa tatlo ka mga suspek.
Nahibaluan nga ginsulong sang lima ang balay sang barangay tanod bangud gindudahan nila ini nga police asset.
Nagpalupok sila sang armas luthang rason nga nasalabat kag nasamaran sa tiyan ang isa ka 2nd year criminology student.
