Bolontaryo nga nag-surrender sa Janiuay Municipal Police Station ang lima ka mga lalaki nga nagpangbuka sang 16 ka mga takop sang suga sa plaza sang Janiuay, Iloilo.
Duwa sa ila naga-edad sang 18-anyos, isa ka 20-anyos kag duwa man ka 17-anyos.
Sa interview sang Bombo Radyo kay PCPT Alwyn Salmon, hepe sang Janiuay Municipal Police Station, iya ginpahayag nga una nga nagkadto sa Barangay hall ang lima ka mga kalalakihan antes nga nagpadulong ang mga ini sa police station upod ang ila nga mga ginikanan.
Suno pa kay Salmon, sa impluwensya sang makahulubog nga ilimnon ang lima rason nga nagpang-tripping ang mga ini sa plaza sang nasambit nga banwa.
Pahayag pa ni Salmon nga nagpangayo man sang pasaylo ang mga lalaki apang kinahanglan sang mga ini nga bayaran ang ila ginguba nga mga suga.
Magapatigayon man sang drug-test sa lima ka indibidwal.
Sa matandaan nga natabo ang insidente kaagahon sang Oktubre 5 kag gilayon man nga nagmando ang alkalde nga imbestigaran insidente.
