ILOILO CITY – Arestado ang lima ka mga mag-abyan matapos nga nadakpan sa akto nga nagapa-uwak sa Barangay West Habog-habog, Molo, Iloilo City.
Ang mga nadakpan amo sanday Dulcisimo Borgonia, Jr., 51, kag Karniel Legario, 31, lunsay mga residente sang nasambit nga lugar.
Nadakpan man sanday Reynaldo Bataquin, 65; Joseph Candolada, 30; kag Phrazed Solinap, 35, mga residente sang Barangay Boulevard, Molo, Iloilo City.
Sa interview sang Bombo Radyo kay Police Captain Benjie Dicen, station commander sang Molo Police Station, iya ginpahayag nga nakabaton sila sang report nagikan sa mga residente sa lugar nga may nagagahud kag nagapa-uwak.
Gilayon nga nagpadulong ang kapulisan sa balay ni Bataquin nga sang ulihi, nahibaluan nga amo ang organizer sang pauwak, kag gilayon nga gin-aresto ang lima.
Nakuha sa ila ang bet money nga P 2,700, siyam ka fighting cock kun sa diin, tatlo diri ang patay kag anum ang buhi.
Sa subong, ang mga ini ang preso na sa Molo Police Station kag natalana nga pasakaan sang nagakaigo nga kaso.
