Lima ka mga quarantine control points ukon ang identified nga entrance kag exit sang syudad sang Iloilo ang nakaeksperyensya sang pagpugok sang trapiko kasunod sang ginpatuman nga border restrictions umpisa subong nga adlaw, Mayo 26 kag magalawig tubtob Mayo 31.
Sa interview sang Bombo Radyo kay Police Col. Uldarico Garbanzos, director sang Iloilo City Police Office (ICPO), iya ginpahayag nga ang lima ka quarantine control points ang yara sa Barangay Tagbak, Ungka, Bitoon, Lanit sa Jaro, kag Mohon sa Arevalo, Iloilo City.
Suno kay Garbanzos, nagapasalamat sila nga apisar sang malawig nga trapiko tuga sang istrikto nga checkpoint kag inspeksyon, wala man sila sang may nabaton nga report sang indi pagkooperar kag indi pagsunod sang mga pumuluyo.
Indi man malikawan suno kay Garbanzos ang pagkainit sang iban nga tawo bangud sa magutok nga trapiko apang wala sa gihapon nagadula ang respeto sang mga tawo sa ila nga border enforcers.
Samtang, ginpahayag ni Garbanzos nga sa subong 200 ka mga police personnel ang gin-augment sa tanan nga quarantine control points sa syudad kag magapadala naman sang dugang nga 300 ka police personnel ang Police Regional Office VI agud magpatuman sang minimum public health standards sa pila ka mga lugar sa syudad nga masami ginakadtuan sang mga tawo.
24/7 naman suno sa natungdan ang ila pagpatigayon sang checkpoints kag inspeksyon.
Samtang, liwat nga nagapahanumdom ang mga border enforcers sa mga pumuluyo sang syudad nga magdala sang identification cards (ID) agud indi mabudlayan sa tion nga maglabay sa tanan nga border inspection areas kag malikawan ang pagpugok sang trapiko.
Sa interview sang Bombo Radyo kay Police Captain Chen Tañagras, hepe sang Arevalo Police Station, iya ginpahayag nga ang mga essential workers ukon nagatrabaho sa syudad sang Iloilo nga naghalin sa probinsya, ang nagakadapat magdala sang ila company ID.
Suno kay Tañagras, ang mga taga syudad naman nga nagatrabaho sa probinsya ang kinahanglan man magpakita sang ila ID sa tion nga magpauli sa syudad.
Sa mga yara naman sa probinsya sang Iloilo apang residente sang Iloilo City kag luyag magpauli sa syudad apisar indi trabaho ang katuyuan, ang pahanugutan man sa gihapon nga makasulod sa quarantine control points kun may ID nga ipakita nga nagapamatuod nga residente ini sang syudad.
