ILOILO CITY – Nagpahayag na ang lima sa pulo ka mga presidentiables sa May 2022 elections nga matambong sa patigayunon nga debate sang Commission on Elections (Comelec).
Sa tweet ni Comelec spokesperson Atty. James Jimenez, ang lima ka presidentiables nga nag-signify nga matambong sa debate amo sanday labor rights activist Leody de Guzman, Manila mayor Isko Moreno, former DND secretary Norberto Gonzales, Senator Panfilo Lacson, kag Senator Manny Pacquiao.
Ang iban nga presidential candidates nga sanday Ernesto Abella, Faisal Mangondato, Jose Montemayor Jr., Ferdinand “Bongbong” Marcos Jr., kag Vice President Leni Robredo, ang mahimo nga nagpamalibad nga magtambong ukon wala pa nakasumiter sang ila written commitment sa Comelec.
Ang presidential debate ang patigayunon sa Marso 19 kag Abril 3 samtang ang vice presidential debate ang matabo sa Marso 20.
Ang debate ang maga-focus sa timely concern sang pungsod kaangay sang COVID-19 pandemic kag ekonomiya kag ang mga pamangkot ang magahalin sa concerned sector groups.
Samtang, ang presidential kag vice presidential town hall ang patigayunon sa Abril 23 kag 24.
Sang Lunes, ginpahaya sang Comelec nga indi mahimo maka-avail sang libre nga slot sa e-rally sang ahensya ang kandidato nga indi magtambong sa mga debate.
May ibutang naman nga blangko nga podium para sa mga indi magtambong nga kandidato.
