ILOILO – Ginselebrar sang probinsya sang Iloilo ang Linggo ng Kabataan 2019.
Sa interview sang Bombo Radyo kay Provincial President SK Federation Ma. Angelica Bianca Requinto, iya ginpahayag nga ang Linggo ng Kabataan ang ginaselebrar tagsa ka tuig nga may katuyuan nga matipon ang mga kabataan kaupod ang Provincial Government agud ma eksperyensyahan ang nagakatabo sa probinsya.
Masobra 50 ka mga kabataan ang nagpakigbahin sa nasambit nga selebrasyon sa diin 15 ka mga youth leaders nga naghalin sa nagkalain-lain nga banwa ang napilian nga magtiglawas bilang Iloilo Governor, Board Members kag Ex Officio Board Members.
Suno kay Requinto, espesyal ang selebrasyon bangud mismo ang mga board members sang Sangguniang Panlalawigan kag elected ofrficials sang probinsya ang mahimo nga mag-tudlo sa mga 15 ka mga youth leaders.
Dugang pa sang natungdan, may mga aktibidad man nga patigayunon para sa mga youth leaders kag plano sang provincial government nga tipunon ang batch sang nakaligad nga tuig kag sa subong agud makapatigayon sang training ukon seminar.
