Nagtipon, naghugyaw, kag nag-isa ang linibo ka Celtics fans samtang ginaselebrar ang nakuha sang Boston nga kampyonato sa 2024 National Basketball Association (NBA) finals!
Ang 90-minutos nga parada ang nagsugod sa TD Garden, nagliso sa Causeway Street sa atubang sang arena kag naglabay man sa City Hall, Boston Common, Boylston Street kag nagtapos sa Hynes Convention Center.
“Thank you for honoring the Celtics tradition. For this team in particular, we are in love with this team. Because it is a team and they have given us so much,” kabahin sang mensahe ni Massachusetts Gov. Maura Healey. “Today we’re going to party and celebrate the Boston Celtics.”
Sa amo man nga selebrasyon, gindayaw ni Boston Mayor Michelle Wu ang liderato sa Celtics — ang nagauyat sang 18 ka kampyonato sa NBA nga amo ang pinakadamo sa bug-os nga maragtas sang liga.
“This was a team willing to face challenging decision, face the non-believers, and work together to build something extraordinary. As a result, Boston is home to the undisputed greatest team in the NBA,” suno kay Wu.
Mangin ang superstar sang Boston nga si Jayson Tatum ang halos indi man makapati sa ila nga nalab-ot bilang team. “It’s unbelievable. It still doesn’t seem true. But just trying to stay in the moment.”
Bangud sa kadamo sang fans nga nag-upod sa parada, mangin ang Celtics owner nga si Wyc Grousbeck ang indi man makalusot sa alagyan.
Nagtuyo ini nga magmaneho pasulod sa arena samtang dala ang Larry O’Brien Trophy kag bag-o himo nga 2024 championship banner kaupod sa iya asawa nga si Emilia Fazzalari kag ila anak. Bangud indi makalabay sa tunga sang traffic kag mga barikada, naglakat na lamang ang mga ini sa Causeway Street samtang dala ang trophy kag banner.
Sa sulod sang Garden, kaupod sa nagtambong amo ang players kag ila family members, mga katapo sang Celtics organization, arena staff, season-ticket holders kag guests lakip ang gobernador kag alkalde.
Ang lima ka starters sang team– Tatum, Jaylen Brown, Jrue Holiday, Derrick White kag Kristaps Porzingis — ang yara gihapon sa kontrata para sa next season. Matapos naka-secure sang long-term extensions kay Brown, Holiday kag Porzingis, ginalauman nga amo man ini ang himuon sang Celtics kanday Tatum kag White subong nga summer.
Martes sang aga (oras sa Pilipinas) sang nakuha nanday Tatum ang kampyonato matapos ginlutos ang Dallas Mavericks sa Game 5, 106-88, nga kadungan man sa anibersaryo sang ila ika-17 ang kampyonato nga nakuha sang 2008.#
