Linibo nga mga Iranians ang nag-upod sa funeral procession para kay anay Presidente Ebrahim Raisi, Foreign Minister Hossein Amir-Abdollahian, kag anum ka iban pa sini nga kaupdanan nga napatay sa pagtibusok sang helicopter sa kabukiran malapit sa border sa Azerbaijan.
Nagasuksok ang mga pumuluyo sang itom nga panapton kag may dala nga Iranian flags kag laragway sang 63-anyos nga late president sang naghalin ang prusisyon sa central square sa northwestern city sang Tabriz nga amo kuntani ang kadtuan ni Raisi sang adlaw nga natabo ang helicopter crash.
Halin sa Tabriz, dal-on ang bangkay sang presidente sa Qom nga ginakonsiderar nga ikaduha sa pinakabalaan nga syudad sa bug-os nga Iran sunod sa syudad sang Mashhad. Sunod nga pagadal-on ang lawas sini sa capital sang pungsod nga amo ang Tehran.
Natalana naman nga magapanguna si Supreme Leader Ayatollah Ali Khamenei sa pagpangamuyo sa farewell ceremony antes ilubong si Raisi sa iya nga dutan-natawhan sa Mashhad sa Huwebes.
Matandaan nga halin si Raisi sa inagurasyon sang dam joint project sang natabo ang helicopter crash kun sa diin nalakip sa mga biktima amo ang provincial officials, myembro sang iya security team kag ang flight crew.
Una na nga gin-report nga ang madamol nga fog ang rason sang pagtibusok sang helicopter apang nagapadayon pa subong ang high-level investigation kaangot sa amo nga insidente.#
