Padayon nga nagasaka ang numero sang nagapasakop sa protesta batok sa gobyerno sa Bangkok, Thailand kasunod sang pagdeklarar sang “state of extreme emergency” sa kapital sang pungsod.
Masobra 10,000 ang nagapanawagan agud sipaon sa pwesto si Prime Minister Prayuth Chan-ocha – anay army chief nga gindesignar nga premier matapos ang kontrobersyal nga eleksyon sang nagligad nga tuig.
Ginapanawagan man nga panubuan ukon hagan-haganon ang gahum nga ginauyatan sang hari sang Thailand nga si King Maha Vajiralongkorn.
Lakip man sa ginasinggitan sang nagaprotesta amo ang pag-dissolve sang parliament, pagpatigayon sang bag-o nga eleksyon, pagbag-o sang Konstitusyon, reporma sa monarkiya kag pagtapos sang intimidation ukon pagpamahog sa mga kritiko sang adminitrasyon.
Suno kay Bombo International Correspondent Rinse Galupo direkta sa Thailand, apisar sensitibo kag hugot nga ginadumilian ang pagpakamalaot sang monarkiya sa amo nga pungsod kag mahimo mapreso sang malawig nga tion ang mga kritiko, wala sang kahadlok ang mga tawo.
Halos tanan suno kay Galupo ang nagapakita sang three-finger salute nga amo ang simbolo sang protest movement.
Suno kay Galupo, ginapanawagan man sang mga nagaprotesta nga i-release na ang gin-aresto nga kapin 40 ka mga aktibista subong nga semana.
Nahibaluan nga subong man nga semana, nag-isyu sang emergency decree ang gobyerno agud matapna ang student-led protest movement paagi sa pag-ban sang mga pagtilipon sang masobra apat ka tawo.
Gina-ban man ang mga online messages nga nagapahog sa national security.
Apisar sini nga mga ginapatuman nga patakaran, wala ginatuman sang mga tawo ang kapulisan kag padayon nga nagatipon sa dalan kag nagauyat sang ila mobile phones.
Nagpagwa naman sang abiso ang embahada sang Pilipinas para sa mga Pinoy sa amo nga pungsod nga likawan ang mga lugar kun sa diin nagakatabo ang protesta kag padayon lang nga magsunod sa pagsulundan sang mga otoridad.
