ILOILO CITY – Ginakasubo ni Iloilo City Lone District Rep. Jam Jam Baronda nga wala nadayon ang pagpauli sang mga Overseas Filipino Workers sa Iloilo.
Sa interview sang Bombo Radyo kay Baronda, iya ginpahayag nga linibo nga Overseas Filipino Workers ang na-stranded sa Metro Manila bangud sa ginapatuman nga lockdown.
Suno kay Baronda, iya nga ginpakig-angutan ang mga opisyal sang gobyerno lakip na si Iloilo City Mayor Jerry Treñas agud nga mabuligan ang seafarers nga luyag makapauli sa syudad kag probinsya sang Iloilo.
Ginpahayag ni Baronda nga mismo si Administrator Hans Leo Cacdac sang Overseas Workers Welfare Administration ang nagpasalig nga pahanugutan nga makapauli ang mga balikbayan kun ila natuman ang guidelines sang Inter-Agency Task Force on COVID-19.
Sa pagkamatuod suno sa mamalidha, nadismaya siya sang nabaton ang mensahe ni Mayor Treñas nga may yara sang nagpositibo sa una nga batch sang Overseas Filipino Workers nga nagpauli sa syudad sang Iloilo sakay sa barko.
Kadungan sini, wala naman napunggan sang natungdan nga pakamalauton ang iya mga kasumpong sa pulitika nga nagapalapta sang malisyoso nga post sa social media.
Sa pagpaathag ni Baronda, indi siya maluyag nga bisan ang mga inosente ang naulamid sa pamulitika kag sa baylo, magbuligay na lang kun tani ang tanan agud nga makapauli na ang mga na-stranded sa Metro Manila.
