ILOILO CITY – Linibo nga deboto ang nagdagsa sa Jaro Metropolitan Cathedral kadungan sang pagsaulog sang fiesta ni Nuestra Señora dela Candelaria subong nga adlaw.
Ang tema sang kapiyestahan amo ang “Iwag ni Nuestra Señora dela Candelaria giya sa paghinun-anon padulong sa paghiliusa kag pagbinuligay para sa tanan nga katawhan”.
Sa Good Morning Philippines program, ginpahayag ni Rev. Fr. Angelo Colada, Director sang Social Communication sang Archdiocese of Jaro, nga ang tema sang kapiyestahan sa subong nga tuig ang nagakahulugan nga si Hesus ang nagaserbe nga Iwag kag si Birhen Maria ang nangin palaagyan.
Suno kay Colada, magluwas sa pagtuo, ang tema ang nagasentro sa pagpakighinun-anon para sa maayo nga kumunidad kag ini ang tion sang pagpangamuyo sa pihak sang mga nagakatabo nga krisis.
Ginpahayag ni Colada nga sa pihak sang Novel Coronavirus scare sa pungsod, madamo sa gihapon ang nagdagsa nga deboto kag kalabanan ang nagsuksok sang masks kag bilang bulig sa pagtapna sang Novel Coronvirus.
Magluwas diri, ginpanugyanan man ang mga deboto nga likawan anay ang pag-uyatay sang kamot kag pagkamustahanay sa tion sang misa kag kinahanglan nga kamot ang gamiton sa pagpangalawat.
