Na-eleher si Lipa Archbishop Most Rev. Gilbert Garcera bilang masunod nga presidente sang Catholic Bishops’ Conference of the Philippines (CBCP).
Pormal siya nga magapungko sa amo nga posisyon sa Disyembre 1, 2025, bulos kay Cardinal Pablo Virgilio S. David nga magakumpleto sang iya nga second and final term bilang president sa Nobyembre.
Natabo ang eleksyon subong nga hapon, Hulyo 5, sa una nga adlaw sang 130th plenary assembly sang mga obispo sa Anda, Bohol.
Si Garcera nga naga-edad 66-anyos ang nagaserbe subong sa CBCP Permanent Council bilang regional representative for Southeast Luzon.
Nagapungko siya bilang arsobispo sang Lipa halin sang 2017 kun sa diin may 3.3 million ka mga Katoliko. Nangin chairman man siya anay sang CBCP Commission on Mission kag sang Commission on Family and Life.
Antes nangin obispo, nagserbe siya bilang assistant secretary general sang CBCP, executive secretary sang Episcopal Commission on Mission, kag national director sang Pontifical Mission Society.
Sa iya bag-o nga katungdanan, magapamuno siya sa collegial body sang mga obispo sa Pilipinas sa masunod nga duha ka tuig.
Nahibaluan nga ang CBCP officials mahimo makaserbe sang duha ka tuig nga termino, kag mahimo maeleher liwat sa isa pa gid ka termino.
Sa pihak nga bahin, ginpili naman sang CBCP si Most Rev. Julius Tonel D.D., ang Archbishop of Zamboanga, nga amo ang mangin Vice President kag magabulos kay Bishop Mylo Vergara sang Pasig.#
