ILOILO CITY – Daw kaangay nga nakakita sang “closure” ang Filipino pole vaulter kag Olympian nga si EJ Obiena matapos nga gin-clear sang Philippine Sports Commission (PSC) ang iya pondo nga may Credit Notice nagikan sa Commission on Audit (COA).
Sa Facebook post ni Obiena, ginpakigbahin niya ang sulat nga iya nabaton sang Marso 31 nga nagapahayag nga base sa audit sang iya liquidation, nakita sang COA nga “in order” ang iya budget nga gingasto.
Ginpahayag man sa nasambit nga sulat nga ang COA ang wala sang may ginpagwa nga Notice of Suspension kag mangin Notice of Disallowance.
Suno kay Obiena, may yara na sila nga closure kag gusto niya nga magbalik na sa pagtutok sa iya ensayo bilang pagpanghanda sa pagtiglawas niya sa pungsod upod ang iya teammates sa Philippine Athletics Track and Field Association (PATAFA) kag mga opisyal sini.
Target sang grupo nga 100% nga mag-focus sa nagahilapit nga SEA Games kag nagpangako nga himuon nila ang tanan agud nga matiglawas sang maayo ang pungsod.
Ang problema sa tunga ni Obiena kag sang PATAFA ang nag-ugat sang ginpatu-patuan ang atleta nga wala gingamit sang maayo ang budget nga para kun tani sa iya Ukrainian coach nga si Vitaly Petrov.
Gilayon naman nga ginkumpleto ni Obiena ang iya liquidation papers samtang wala naman gin-endorso sang PATAFA si Obiena sa SEA Games kag subong man sa World Indoor Championships.
Diri kag nagpatunga na ang PSC kag sang Marso 31, nahitso na sang duha ka kampo ang problema.
Si Obiena ang reigning gold medalist sa SEA Games kag ika-anum sa world rankings.
