ILOILO CITY – Suspendido na sang tatlo ka bulan ang lisensya sang Indian National nga nakabunggo-patay sa isa ka frontliner sa Mandurriao, Iloilo City.
Ang biktima ginkilala nga si Henry Jun Jardio samtang ang suspek naman amo si Harjinder Gil, 44 anyos.
Ini kadungan man sang pagserbe sa iya sang show cause order.
Sa interview sang Bombo Radyo kay Atty Gaudioso Geduspan, Assistant Regional Director sang Land Transportation Office 6 iya ginpahayag nga pormal na nga naserbehan sang show cause order si Gil sa diin may yara lang sya sang lima ka adlaw agud depensahan ang iya kaugalingon kun ngaa nagakadapat nga indi pag isuspendi ang iya nga lisensya.
Suno kay Geduspan, nagakadapat man nga iathag ni Gil kun matuod nga nagtuyo pa sya nga malagyo sa baylo nga buligan ang biktima lakip man ang kun ngaa naga drive sya samtang yara sa idalom sang impluwensya sang makahululubog nga ilimnon.
