Ginpasa na sa Philippine National Police-Anti-Cybercrime Group (PNP-ACG) ang lista sang social media influencers nga nakit-an nga naga-promote sang illegal online gambling.
Suno ini kay Department of Information and Communications Technology-Cybercrime Investigation and Coordinating Center (CICC) chief Undersecretary Renato “Aboy” Paraiso sa isa ka press conference subong nga adlaw, Nobyembre 13.
Pahayag sini, naka-monitor ang Threat Monitoring Team (TMC) kag ang advocacy group nga Digital Pinoys sang dugang nga 30 ka influencers nga naga-promote sa gihapon sini nga iligal nga buluhaton.
Suno kay Paraiso, 1.1 million tubtub sa 9.2 million ang followers sang top 15 influencers nga naga-post sa gihapon sang content nga naga-unod sang promotions sang illegal online gambling websites.
Yari ang nalakip sa lista:
- perkz gaming
- Jungsuuk
- Christian Merck Grey
- Whamos Cruz
- Toni Fowler
- Norme Garcia
- Vic Desucatan
- Miss Ginbilog
- Cherry White
- Boy Tapang
- Da Siblings
- Wampipty
- TG
- Ohmyveenus
- MotoDick
Gin-endorso ang lista sa pulis para mapasakaan sang kaso. Antes sini suno sa CICC, nahatagan na sang tyansa ang influencers nga kakason nila ang ila nga content, apang wala sila nag-comply, rason nga ipaagi na lang sa kaso.
Ang endorsement sa PNP-ACG amo ang magasugod sang proseso sang case build-up batok sa influencers.
Lakip sa mahimo nalapas sang sini nga influencers amo ang Cybercrime Prevention Act of 2012, Presidential Decree No. 1602 (Prescribing Stiffer Penalties on Illegal Gambling), kag ang Article 315 sang Revised Penal Code sa estafa.
Ginalantaw man sang ahensya nga sa padayon nga imbestigasyon, posible nga matukiban ang “grand conspiracy” ukon ang large-scale syndicated estafa nga nagalakip sang influencers.
