ILOILO CITY – Ipasa na sang Gilas Pilipinas ang pangalan sang final 12 nga magahampang para sa 2023 FIBA World Cup sa patigayunon nga technical meeting subong nga adlaw, Agosto 23.
Ini matapos nga 13 lamang nagikan sa original pool ang nakatambong sa open practice nga ginpatigayon kahapon, tatlo ka adlaw antes ang pormal nga pagbukas sang 2023 FIBA World Cup.
Sanday Jordan Clarkson, Scottie Thompson, CJ Perez, Kiefer Ravena, RR Pogoy, June Mar Fajardo, AJ Edu, Kai Sotto, Japeth Aguilar, Dwight Ramos, Jamie Malonzo, Rhenz Abando, kag Chris Newsome ang pila sa mga nagtambong sa practice.
Ang iban nga mga pool members kaangay nanday Thirdy Ravena, Bobby Ray Parks, kag Calvin Oftana ang wala nakatambong.
Sang ginpamangkot si Gilas Pilipinas head coach Chot Reyes may kaangtanan sa iban nga players nga absent, ginpahayag niya nga magadesisyon pa sila antes ang technical meeting.
Si Oftana ang nakahampang sang isa ka bes sa tatlo ka mga tune-up games sang Pilipinas subong nga semana samtang sanday Parks kag Thirdy Ravena ang wala gid nakahampang.
Sa Agusto 25, buksan sang Gilas ang ila World Cup campaign batuk sa Karl-Anthony Towns-led Dominican Republic nga world no. 23.
