Na-trangkaso ang pila ka players sang defending champions nga France samtang nga naga-preparar para sa 2022 World Cup final match batok sa Argentina.
Suno sa French Football Federation (FFF), sanday Raphael Varane kag Ibrahima Konate ang katapusan nga nakaangkon sang trangkaso.
Matandaan nga sa semi-finals batok sa Morocco, wala man nakahampang defender nga si Dayot Upamecano kag ang midfielder nga si Adrien Rabiot bangud sa malain nga kondisyon.
Wala naga-panic si France coach Didier Deschamps kag ginsiguro nga nagahalong ang team nga indi na malatnan ang iban pa nga players.
Suno naman sa isa pa ka player nga si Kolo Muani, gin-isolate na ang players nga nagmasakit, kag may yara sang mga doktor nga nagatatap sa ila.
Positibo ang coach nga magaayo pa sanday Upamecano kag Rabiot para sa showdown batok sa team ni Lionel Messi sa Lusail Stadium,11:00 sa gab-i oras sa Pilipinas.
Pananglitan malain gid ang kondisyon nanday Konate kag Varane, ginapanan-aw nga mabudlayan si Deschamps sa selection decision bangud lakip sila nga duha sa top three defenders sang France. ##
