Wala pa sa gihapon sang pinal nga desisyon kun pahanugutan ang spectators sa Tokyo 2020 Paralympics.
Ini ang kasunod sang padayon nga pagsaka sang COVID-19 cases sa pungsod Japan tuga sang pagsulod sang Delta variant.
Matandaan nga sa bag-o lang natapos nga Tokyo 2020 Olympics, gin-ban ang mga fans sa tanan nga venues sa diin ginapaidalom sa swab test ang tanan nga atleta kada adlaw.
Suno kay Bombo Samurai International Correspondent Josel Palma, direkta sa Japan, sa Paralympics nga maga-umpisa sa Agusto 24 tubtob Septyembre 5, ginalauman nga amo man ang mangin sitwasyon.
Pahayag ni Palma, ang Tokyo kag lima ka iban pa nga rehiyon, ang napaidalom na sa virus state of emergency, sa diin ginadumilian ang bars kag restaurants sa pagserbe sang makahulubog ilimnon kag tubtob lang sa las 8:00 sang gab-i ang ila nga operasyon.
Sa pihak sini, yara naman sa final phase sang ila technical kag tactical training ang anom ka atleta nga magarepresenta sang Pilipinas sa Paralympics.
Ang anom ka Filipino Tokyo Paralympians amo ang swimmers nga sanday Gary Bejino kag Ernie Gawilan, wheelchair racer nga si Jerrold Mangliwan, discus thrower nga si Jeanette Aceveda, powerlifter nga si Achelle Guion, kag taekwondo jin nga si Allain Ganapin.
