MANDURRIAO, ILOILO CITY – Dakop sa drug buy bust operation ang live-in partner sang anak sang drug personality nga si Nognog Prevendido sa Brgy. Kauswagan, Iloilo City Proper.
Ang subject amo si Jesrel Ajeto, 32, residente sang Zone 2 Barangay Bakhaw, Mandurriao, Iloilo City.
Si Ajeto ang live-in partner ni Averose Prevendido, 18, residente man sang nasambit nga lugar kag anak ni Nognog.
Si Averose ang una nga nadakpan sang Regional Police Drug Enforcement Unit 6 sang nagligad nga bulan sa drug buy bust operation sa Dungon A, Jaro, Iloilo City.
Sa interview sang Bombo Radyo kay Police Lt. Col. Antonio Benitez Jr., pinuno sang Iloilo City Drug Enforcement Unit, iya ginpahayag nga nakuha sa posisyon ni Ajeto ang ₱408,000 nga balor sang iligal nga droga.
Si Ajeto ang napreso naman sadto sa New Bilibid Prison bangud sa pagduso sang iligal nga droga.
Sang nadakpan ang live-in partner sini, nagsaylo ini sa lain nga lugar tubtub nadakpan sang mga otoridad.
Sa subong, preso na si Ajeto sa Iloilo City Police Station 1 kag nagapangatubang sang kaso nga paglapas sa Republic Act No. 9165 ukon Comprehensive Dangerous Drugs Act of 2002.
