ILOILO CITY- Nasapwan nga wala na sang kabuhi ang isa ka pulis nga ginaalegar nag- suicide sa tunga sang kagulangan sa Brgy. Damilisan, Miag-ao, Iloilo.
Ang biktima amo si Patrolman Marvin del Castillo,27, tumandok sang Devera, Sara, Iloilo apang temporaryo nga nagaistar sa Purok 2, San Joaquin, Iloilo, kag isa ka police trainee nga assigned sa San Joaquin Municipal Police Station kag nagapaidalom sa Pre Basic Internal Security Operation Course.
Sa interview sang Bombo Radyo kay PCapt Marvin Buenavista, hepe sang Miag-ao Municipal Police Station, iya ginpahayag nga may nakit-an nga gunshot wound sa ulo sang biktima sang nasapwan ang lawas sini malapit sa daan nga watch tower (Baluarte) sa lugar.
Antes ang pagkasapo sa biktima, una nga nakit-an ni Jonel Cabrillos, abyan sang pulis, ang motorsiklo sini sa higad sang dalan rason nga ginpahibalo niya ini gilayon sa live-in partner ni del Castillo.
Suno kay Cabrillos, didto na nila ginpangita ang biktima sa lugar kag nakit-an nila ini apang wala na sang kabuhi.
Blangko naman ang mga kakilala ni del Castillo kon ano ang madalom nga rason sa ginapatihan pagpanginmatay sini.
Sa interview sang Bombo Radyo kay Glory Ann Franco, live- in partner ni del Castillo, iya ginpahayag nga wala man sila sang may gin- awayan kag wala man nakapanugid kon may yara ini sang problema.
Suno kay Franco, antes ang insidente, naglisensya lang kahapon ang biktima nga magapadulong ini sa San Joaquin Municipal Police Station agud mag- duty apang wala ini nakapadulong sa amo nga police station.
Antes naman natabo ang ginapahayag pagpanginmatay sang biktima, nakaistorya pa ini sa iya utod paagi sa videocall kon sa diin nakit-an sang utod sang pulis nga yara ini sa kagulangan kag nagainom sang whiskey.
Apang, suno kay Franco, wala man ini nakamuno sa iya magulang kon may problema ini.
Suno naman sa mga residente sa lugar kon sa diin nasapwan ang pulis, wala man sila nakabati sang lupok sang armas.
Ginaplano na nga ipaidalom sa autopsy si del Castillo agud makumpirma kon nagpanginmatay gid man ini ukon may foul play sa likod sang iya kamatayon.
