ILOILO CITY – Narekord sang City Epidemiological and Surveillance Unit ang 76 ka kaso sang COVID-19 kahapon, Mayo 19 — ang pinakamataas nga single-day tally sang COVID-19 cases subong nga bulan sang Mayo.
Mas mataas ini sa 64 nga narekord sang nagligad nga Mayo 18.
Sa interview sang Bombo Radyo kay Mr. Jeck Conlu, COVID-19 spokesperson sang syudad, iya ginpahayag nga padayon man ang pahanumdom sang COVID-19 team sa publiko nga indi gid magkumpiyansa kag magsunod gid sa mga protocol bisan sa sulod sang puluy-an kag ulubrahan.
May hingyo man si Mayor Jerry Trenas sa publiko nga samtang wala pa naaprubahan ang request sa Modified Enhanced Community Quarantine (MECQ) nga status sa syudad, ipaiway anay ang paggwa sa balay bisan sa sulod lang sang isa ka semana.
Base sa data sang CESU, nagdangat sa 72.07 percent ang mga kaso sang virus nga halin sa local transmission.
Ginahibalo pa sang COVID-19 team ang rason sang liwat nga pagsaka sang kaso sa syudad. #
