ILOILO CITY – Makabig nga kwestyonable ang liwat nga pagdakop sa mga preso nga nakabenepisyo sang Good Condct Time Allowance.
Ini ang kasunod sang mando ni Presidente Rodrigo Duterte nga magsungka ang kapin sa 2,000 ka mga preso nga nakabenepisyo sang Good Conduct Time Allowance sa sulod sang 15 ka adlaw bangud nga mapaslawan, sila ang pagakabigon nga fugitive ukon kriminal kag may yara sang P1 million nga bounty.
Sa exclusive interview sang Bombo Radyo kay Atty. Noel Palomado, isa sa mga Bombo Abogado, iya ginpahayag nga makabig nga irrevocable ukon indi na mabawi kun nahatag na ang credits sa isa ka preso.
Suno kay Atty. Palomado, santo sa layi, wala nadala sa mga benepisyaryo sang Good Conduct Time Allowance ang mga nakahimu sang heinous crime ukon ang mga may silot nga reclusion perpetua.
Bag-o naman mahatagan sang release order ang isa ka preso, magadepende naman sa Secretary of Justice ang pinal nga desisyon.
Ginpahayag ni Atty. Palomado nga mahimo nga kwestyunon sang mga preso ang liwat nga pagdakop sa ila bangud nga valid sa gihapon ang release order.
Ang Korte Suprema lang suno kay Atty. Palomado ang makadeklarar nga null and void ukon invalid ang release order.
Magluwas diri, mahimo man nga kwestyunon sang mga preso ang pagdakop sa ila nga wala sang warrant of arrest nga ang Korte Suprema lamang ang makapaguwa kag indi ang verbal announcement sang presidente.
