ILOILO CITY – Nag-ibwal si Iloilo City Mayor Jerry Treñas matapos nakalab-ot sa iya ang impormasyon nga may isa ka department head nga nagyawyaw sa isa pa ka opisyal sa Iloilo City Hall.
Ang wala ginhingadlan nga department head nga gintawag sang alkalde nga ‘not performing asset’ ukon NPA ang nagyawyaw sa isa pa ka opisyal bangud gin-alegar sini nga gin-agaw ang iya nga trabaho.
Sa ginpatigayon nga pagsinapol upod sa mga department heads sang syudad, ginpahayag ni Treñas nga wala sang kinamatarong ang sin-o man nga department head nga magkwestiyon sang ginhatagan niya sang responsibilidad.
Suno sa alkalde, kun may magreklamo, magpalapit lamang sa iya.
Dugang pa niya, ang pagpangyawyaw ang gina-ubra lamang sang mga bastos.
Nagpaandam man ang alkalde nga kun suliton pa ini, pasakaan niya ini sang kaso sa Civil Service Commission ukon indi gani, idagdag nalang sa bintana.
Ginpasalamatan man ni Treñas ang tanan nga mga performing department heads sang syudad samtang ginhangkat man niya ang amo nga ‘not performing asset’ nga magtindog kag magpakilala agud nga mapalakpakan.
