Matunog ang espekulasyon nga posible makaupod ni Liza Soberano sa iya first Hollywood movie ang American actors nga sanday Cole Sprouse kag Kathryn Newton.
Sa upcoming movie ini nga “Lisa Frankenstein” nga ginsulat sang Oscar winner nga si Diablo Cody kag gina-direct ni Zelda Williams, anak sang late actor nga si Robin Williams.
Wala pa na-anunsyo kun kalakip si Liza sa cast sang pelikula, apang sa Instagram Story ni Jessie Stafford (nagapanag-iya sang Los Angeles-based event production company JSLA Events), gin-repost ang isa sa posts ni Newton sa set kag nagsiling nga: “Sending you and your team all the amazing energy to kill this film!”
Na-tag sa amo nga story si Liza, Transparent Arts, kag ang “Lisa Frankenstein” director nga si Williams.
Mayo lang sang gin-anunsyo nga nagpa-manage si Liza kay James Reid nga kabahin sang US-based Transparent Arts group kun sa diin may yara sang Asian-American talents.
Isa pa sa mga clue nga posible nga yara sa cast sang movie si Liza amo bangud nakit-an nga gina-follow siya nanday Williams kag Newton sa Instagram.
Nakit-an man nga gin-like ni Liza ang Instagram post ni Williams nga naga-promote sang “Lisa Frankenstein.”
Ginahulat pa ang opisyal nga kumpirmasyon ni Liza kun kabahin siya sang amo nga Hollywood film, nga kun matabo, amo ang iya debut sa iya potential career sa United States. ##
