Nakalab-ot naman sa Vietnam ang abilidad sang Filipino-American actress nga si Liza Soberano!
Nagpungko si Liza bilang judge sa 1st Ho Chi Minh City International Film Festival sa amo nga pungsod.
Partikular sini nga gintutukan ang First or Second Film Category ukon ang kategorya para sa debut ukon second feature films sang bag-uhan nga directors kag talents halin sa lain-lain nga mga pungsod.
Kaupod sang aktres ang Vietnamese-American kag Oscar-winning editor sang “Whiplash” nga si Tom Cross, film producer nga si John Badalu, film director nga si Nguyen Thanh Van kag New York Asian Film Festival Executive Director nga si Samuel Jamier.
Sa Instagram, ginpahayag sang aktres nga bugal sini nga mangin isa sa jury members sang inaugural event.
“Truly so inspired to continue working in an industry that encourages freedom of expression and challenges the way we think. Congratulations to all winners!,” kabahin sang post nga ginkalipay naman sang iya fans.
Si Liza man ang presenter sang Best Actress award.
Sa amo man nga film fest ginkilala ang Pinoy talent paagi sa pelikula ni Sheron Dayoc nga “Gospel of the Beast” nga nagdaog sang Golden Star Award ukon Best Film. #
