Dakop sa ginpatigayun nga buy bust operation sang Regional Drug Enforcement Unit (RDEU) ang isa ka llamador sang Bulangan sa Distrito sang Jaro, Syudad sang Iloilo.
Ang subject ang ginkilala nga si John Marc Sinibalo, 27 anyos, may asawa kag residente sang Simon Ledesma Jaro Iloilo City. Suno kay Sinibalo tatlo na katuig ang nakaligad sangt ulihi siya naggamit sang iligal nga droga apang iya ginpanginwala nga nagabaligya siya sang iligal nga droga. Pahayag pa niya nga isa siya sadto ka drug surrenderee kag natapos man niya ang iya nga pagpaidalom sa rehabilitation.
Sa interview sang Bombo Radyo kay Police Captain Mark Dado, team leader sang RDEU, iya ginpahayag nga madugay na nila nga ginamonitor si Sinibalo apang nabudlayan sila nga dakpon ini.Suno pa kay Dado antes paman nila natigayun ang pag buy bust may yara na nga daan sang na dispose nga mga items si Sinibalo sa sulod sang bulangan. Pahayag pa niya nga nagtinguha pa kuntani nga magpalagyo ang subject apang gilayun naman nga nadakpan sang operatiba.
Ginakabig naman si Sinibalo bilang High Value Target Level 1 (HVT 1) kag ginapatihan remnants pa sang Prevendido drug group. Dugang pa ni Dado nga sa syudad lang nagakuha sang suplay ang subject kag ila ini nga hibaluon kun sin-o ang ginakuhaan sang suplay.
Nahibaluan nga nakuha sa posisyon sang subject ang 11 ka sachet sang ginapatihan shabu kag buy bust money nga P1,000. Preso na subong si Sinibalo kag magapangatubang sang kaso nga paglapas sa Republic Act 9165 ukon Comprehensive Dangerous Drugs Act.
