ILOILO – Ginkasugtan sang mga alkalde sa probinsya sang Iloilo kag mga tiglawas sang Regional Inter-Agency Task Force kag sang Regional Task Force nga kinahanglan nga magpaidalom sa 14-day quarantine ang mga Returning Overseas Filipinos nga halin sa Metro Manila nga magapauli sa Iloilo.
Ini ang kasunod sang ginpatigayon nga pagsinapol kun sa diin isa sa mga nagtambong amo si Iloilo Gov. Arthur Defensor Jr. agud istoryahan ang guidelines nga ginpaguwa sang National Task Force nga indi na mandatory ang quarantine kag ang pagpaidalom sa Reverse Transcription Polymerase Chain Reaction (RT-PCR) test sa mga Returning Overseas Filipinos apang baliskad naman diri ang nakasaad sa una nga guidelines sang Inter-Agency Task Force.
Sa interview sang Bombo Radyo kay Defensor, iya ginpahayag nga kun tani, isa lang ang Task Force agud nga malikawan ang pagsalangisag ilabi na kun may yara sang guidelines nga ginapaguwa.
Suno kay Defensor, nakasugtan sa pagsinapol nga mandatory ang pagpaidalom sa 14 ka adlaw nga quarantine apang kinahanglan lang ang RT-PCR test kun nakitaan sang sintomas ang Returning Overseas Filipino.
Katuyu-an sang nasambit nga lihok suno kay Defensor amo nga malimitahan ang local transmission sang virus sa probinsya sang Iloilo.
