ILOILO CITY – Wala sang ihibalo ang Local Civil Registrar kun sa diin nakuha ni Iloilo City Mayor Jerry Treñas ang impormasyon tuhoy sa ginapahayag 180 ka peke nga kasal nga ginparehistro.
Sa interview sang Bombo Radyo kay Juncae Manikan, pinuno sang Local Civil Registrar, iya ginpahayag nga nakibot siya sa ginbuyagyag ni Treñas kadungan sang flag raising ceremony kahapon nga adlaw.
Suno kay Manikan, sila sa Local Civil Registrar ang nagarehistro lamang sang marriage certificate kag wala na sila sang labot sa pagpatigayon sang kasal.
Ginpahayag ni Manikan nga kun mass wedding ang ginapatigayon, mahimo nga may yara pa sang labot ang Local Civil Registrar.
Ini bangud nga ang mass wedding ang isa ka programa sang Iloilo City Government.
Sa pihak sini, ginpahayag ni Manikan nga mas makapaayo kun may yara sang imbestigasyon nga patigayunon agud mahibaluan kun sin-o ang dapat nga manabat.
Samtang, desidido si Iloilo City Mayor Jerry Treñas nga kasuhan ang mapamatudan nga yara sa likod sang pagparehistro sang 180 ka peke nga kasal sa Local Civil Registrar.
Sa interview sang Bombo Radyo kay Treñas, iya ginpahayag nga temprano pa agud nga magpaguwa siya sang judgement tuhoy sa kun sin-o ang dapat nga manabat
Suno kay Treñas, iya na lang nga ginatugyan sa National Bureau of Investigation ang pagpangusisa.
Ginpahayag ni Treñas nga kinahanglan nga indi na masulit ang kasubong nga aktu bangud nga makaluluoy man ang mag-asawa nga nabiktima sang peke nga kasal.
Magapangatubang sang kaso kriminal kag administratibo ang sino man nga mapamatudan nga may kahilabtanan sa nasambit nga buluhaton.
Santo sa iya pagpangusisa suno sa alkalde, ginakabig nga peke ang 180 ka kasal bangud nga ang nagpatigayon sang seremonya ang wala sang otoridad kasubong sang isa ka dismissed judge.
