ILOILO – Balantayan sa subong nga tuig ang pagpagwa sang pito ka mga film sang Department of Tourism (DOT) Western Visayas sa pagahiwaton nga film festival sa Disyembre 6 tubtob 15.
Sa interview sang Bombo Radyo kay Director Elvert Bañares, founder sang Cinekasimanwa, ang official film festival sang rehiyon, iya ginpahayag nga ini ang isa naman ka kahigayunan agud mapabutyag sang mga Ilonggo ang ila kultura indi lamang sa pungsod kundi mangin sa bilog nga kalibutan.
Suno kay Bañares, pito na ka tuig nga nangin tradisyon ang pagpagwa sang mga pelikula sa Western Visayas kag ini ang natigayon paagi sa bulig sang Department of Tourism, National Commision for Culture and the Arts, Film Development Council of the Philippines, kag Western Visayas Film Network.
Iya ginpahayag nga may ara kategorya para sa mga estudyante kag kabataan edad 22 anyos kag mas lamharon, kag may ara man kategorya para sa 23 anyos pataas.
Ginaagda man ni Bañares ang mga pumuluyo nga sakdagon ang amo nga kahiwatan sa Disyembre bilang pagpakita suporta sa lokal nga mga pelikula.
