ILOILO – Naghingyo sang bulig ang national government sa tagsa ka Local Government Unit may kaangatanan sa mga programa nga ginapatigayon agud mabuligan ang mga mangunguma nga apektado sang Rice Tarrification Law.
Nahibaluan nga kahapon, nakigsapol si Iloilo Governor Arthur Defensor Jr. kay Department of Agriculture Secretary William Dar kaupod ang iban pa nga mga tiglawas sang nagkalain-lain nga ahensya sang gobyerno.
Sa interview sang Bombo Radyo kay Defensor, iya ginpahayag nga naistoryahan sa pagsinapol kun ano ang mga programa nga patigayunon agud mabuligan ang mga magagmay nga mangunguma nga apektado sa pagnubo sang presyo sang humay.
Gin-athag ni Defensor nga sa subong, wala pa sang ikasarang ang Iloilo Provincial Government kag indi niya mapasalig nga makahatag sang dako nga bulig.
Sa pihak sini, ginpahayag sang Gobernador nga ginapangitaan na sang paagi agud mabuligan ang mga mangunguma.
Nagaplano man ang National Food Authority nga pasakaan sang tatlo ka piso ang presyo sang kada kilo sang humay nga ila baklon sa mga mangunguma.
Pagahatagan man sang cash assistance ang mga kooperatiba nga nagabaligya sang humay.
