ILOILO CITY- Pagadiskusyunan sang Local School Board sa syudad sang Iloilo kun ano ang mas maayo nga himuon sa natalana nga pagbukas sang klase sa Agosto 24.
Sa interview san Bombo Radyo kay Iloilo City Councilor Love Love Baronda, iya ginpahayag nga istoryahan pa ang mangin konkreto nga plano para sa edukasyon sa idalom sang new normal bangud sa Coronavirus Disease 2019 (COVID-19).
Suno kay Baronda, wala man sang problema sa nangin pahayag ni Iloilo City Mayor Jerry Treñas kag ni Iloilo Governor Arthur Defensor Jr. nga ipaiway anay ang pagbukas sang klase apang nahangpan man niya ang sentimento sang Department of Education nga magbukas sa Agosto 24.
Ginpahayag ni Baronda nga madamo ang dapat diskusyunan bangud may yara sang nagkalain-lain nga concerns nga dapat tutukan kag nagkalain-lain man ang sitwasyon sa tagsa ka lugar.
Sa subong, ang mga ginikanan ang may yara sang daku nga katungdanan sa pagdesisyon sa kun ano ang kaayuhan para sa ila kabataan.
