ILOILO CITY- Nagpabutyag sang pagkabalaka ang mga sugarcane planters sa Iloilo sa panibag-o nga tikang sang gobyerno nga pag-import sang 440,000 metric tons sang kalamay.
Sa interview sang Bombo Radyo kay Iloilo 3rd District Board Member Matt Palabrica, iya ginpahayag nga wala pa man nag-abot ang una nga batch sang imported nga kalamay nga ginalauman ang arrival sa pinakamadali nga panahon, nagsarurot na ang presyo sang per bag sang kalamay sang mga local sugarcane farmers.
Suno kay Palabrica, ginahingalitan sang mga traders ang sitwasyon bangud yara na lang subong sa P2,800 ang per bag sang kalamay nga mas manubo sa P3,500 pe bag sang nagligad nga semana.
Pahayag sang opisyal, dako gid ang madula sa kita sang mga sugarcane farmers.
Kwestiyonable naman suno sa natungdan bangud apisar ginapanubuan sang mga traders ang ila bidding sa local nga kalamay, wala man naganubo ang presyo sini sa merkado.
Matandaan nga sang nagligad nga semana ginpagwa sang Sugar Regulatory Administration ang Sugar Order Number 6 nga naga- authorize sa pag-import sang 440,000 metric tons sang kalamay.
Sa amo nga volume sang kalamay, 200,000 MT ang i-allocate sa konsumidor samtang ang 240,000 MT ang para naman sa buffer stock para i-release sa consumers sa tion nga aprubahan sang Sugar Regulatory Administration Board.
Ang una nga arrival sang refined sugar nga 100,000 MT ang ginalauman sa pinakamadali nga panahon.
Ang ikaduha nga arrival sang refined sugar nga 100,000 MT ang magaabot antes ang Abril 1,2023.
Ang buffer stock naman nga 240,000 ang magaabot pagkatapos sang Abril 1,2023.
Ang una nga arrival ang i-classify bilang “C” ukon reserved sugar apang gilayon man i-reclassify bilang “B” ukon domestic sugar kun makompleto ang kinahanglan nga rekisitios kag dokumentation sa Sugar Regulatory Administration.
Ang second arrival ang i-classify man bilang “C” apang mahimo nga ma-reclassify nga “B” paglapaw sang Marso 30.
Ang buffer stock naman ang i-classify nga “C” ukon reserved sugar.
Ang tanan nga imported sugar sa idalom sang sini nga sugar order ang taguon sa Sugar Regulatory Administration-registered warehouse ukon direkta sa Consumers warehouse apang kinahanglan nga i-inspect agud indi magsimpon ang imported sugar stocks sa domestic sugar stocks.
