Ginkumpirma sang United Kingdom nga may nagakatabo na nga local ukon community transmission sang monkeypox virus sa amo nga pungsod.
Ini apisar nga ang recorded nga kaso sa amo nga pungsod ang wala man sang travel history sa West Africa kun sa diin endemic ang nasambit nga balatian.
Suno pa sa UK Health Security Agency (UKHSA), i-release subong nga adlaw sang Lunes ang dugang nga numero sang kaso matapos nga naka-record ini sang 20 ka kaso sang Byernes.
Ginpahayag naman ni UKHSA chief medical adviser Susan Hopkins nga nagaka-detect ang dugang nga mga kaso kada adlaw.
Wala ginkumpirma ang report kun may indibidwal nga ginapaidalom subong sa intensive care; apang gin-athag nga concentrated subong ang outbreak sa urban areas, kag concentrated sa gay ukon bisexual men.
Apisar ginpahayag nga manubo pa ang risgo sa general population, gin-abisuhan ang mga tawo nga mangin alerto.
Makalaton ang monkeypox paagi sa contact sa skin lesions kag droplets sang contaminated person, amo man kun may gina-share nga mga items kaangay sang bedding kag towels.
Lakip sa sintomas amo ang hilanat, pagpalanakit sang lawas, pagpalangurog, pagbatyag sang kakapoy, swollen glands, kag rashes sa kamot kag nawong nga daw sulalob.
