ILOILO – Kuntento ang isa ka Locally Stranded Individual sa nangin akomodasyon sa quarantine facility sang Local Government Unit nga iya ginpauli-an.
Sa exclusive interview sang Bombo Radyo kay alyas Jun, isa sa mga Ilonggo Locally Stranded Individuals nga naghalin sa Metro Manila, iya ginpahayag nga indi madula ang kakulba nga iya nabatyagan bangud naka-upod niya sa flight ang mga repatriated Overseas Filipino Workers.
Suno kay Jun, Hunyo 9 siya nag-abot sa Iloilo International Airport, ginsugat sang ambulansya nga ginapanag-iyahan sang Local Government Unit nga iya pauli-an kag gindul-ong sa isa ka eskwelahan nga nagaserbe nga quarantine facility.
Ginpahayag ni Jun nga naga-isahanon lang siya sa isa ka classroom, apang ang mga may kaupod kasubong sang mag-iloy ukon mag-asawa ang ginatingob lang sa isa ka ka hulot.
Sa tagsa ka aga, ginpahayag ni Jun nga may yara sang attendance sheet nga ginapalibot agud masigurado nga wala sang may nakapalagyo sa quarantine facility.
May yara naman sang ginpahamtang nga pulungku-an sa sagwa sang classroom agud tungtungan sang pagkaon ukon ano man nga rasyon kag may yara sang plastic bag nga ginahatag agud butangan sang kinan-an ukon basura.
Magluwas sa pagkaon, may yara man sang hygiene kit nga ginapanghatag ang Local Government Unit kag mahimo man nga makapadala sang pagkaon ukon gamit ang mga himata sang Locally Stranded Individual ukon repatriated Overseas Filipino Workers.
Bangud nga makaduha na ka beses nga nagnegatibo sa COVID-19, ginpahanugutan na si Jun nga magpauli sa ila balay agud tapuson ang 14-day quarantine.
Sa pihak sang kabudlay, ginpahayag sang natungdan nga dapat gid nga magsunod sa protocol agud nga mangin hilway sa virus kag makaupod gilayon ang pamilya.
