Maid-id ang proseso nga gina-agyan sang mga locally stranded individuals antes makapauli sa ila tagsa ka mga lugar.
Sa interview sang Bombo Radyo kay alyas Jun, isa sa mga strandees sa Manila, iya ginpahayag nga kinahanglan magpangayo sang health certificate sa local government unit kun sa diin ini na stranded.
Suno kay Jun, magluwas sa health certificate, kinahanglan man sang notice nga nagapamatuod nga nakatinir ikaw sa nasambit nga lugar.
Ang amo nga mga papeles ang kinahanglan pa nga ipresenta sa local police agud usisaon.
Matapos sini, obligado man siya nga magkuha sang travel pass sa National Capital Region Police Office sa diin kinahanglan ang pirma sang pamunuan.
Pahayag niya, apat ka adlaw niya nahitso ang mga papeles nga kinahanglanon kag ini ang ipresentar naman sa airport para sa may mga sweeper flight.
Apang nagakadapat man nga siguraduhon nga nakahibalo ang local government unit sang imo nga puli-an nga may maabot nga locally stranded individual agud nga may masugat.
Dugang pa sang natungdan, ang nag-hitso kag nag-preparar mismo sang flight niya pinaagi sa sweeper flight halin Manila padulong sa Iloilo amo ang opisina ni Iloilo City Lone Dist. Rep. Julienne “Jam-jam” Baronda.
