BAGUIO CITY – Naga-eksperyensya na sang mental health issues ang mga locally stranded individuals.
Ini ang ginpahayag ni Linda Flor Irlandesa sang La Paz, Iloilo City nga na stranded sa Baguio City.
Sa interview sang Bombo Radyo kay Irlandesa, iya ginpahayag nga magluwas sa problema pinansyal, isa sa mga pagpanghangkat nga iya gina-agyan sa subong amo ang mental health issues.
Suno kay Irlandesa, Marso 14 siya nag-abot sa Baguio City kag natalana kun tani nga magpauli sang Marso 18 apang naabutan siya sang lockdown.
Ginpahayag ni Irlandesa nga napakig-angutan na niya ang mga concerned agencies apang kasubong nga wala sang maathag nga plano kun san-o kag kun paano siya makapauli.
Ang dokumento nga kinahanglanon sa pagpauli ang nakumpleto naman niya magluwas lang sa RT-PCR test bangud nga ini ang limitado lamang sa mga nakitaan sang sintomas.
Sa iya bahin, ginpahayag ni Irlandesa nga wala siya sang problema kun pinansyal nga aspeto ang pagahambalan apang indi niya maagwantahan ang stress ilabi pa nga kanselado sa gihapon ang flight kag ang byahe sang barko.
Bangud sa kapabayaan sang concerned agencies, ginpahayag sang natungdan nga mas makaluluoy pa gid ang locally stranded individual nga ginakulang na sa budget.
