ILOILO CITY – Ginakasubo ni Punong Barangay Joy Salfin sang Bolilao, Mandurriao,Iloilo City nga ginpalawig tubtub sa Oktubre 1 sang hapon ang total lockdown sa ila lugar.
Ini matapos nga as of September 27, naglab-ot na sa 44 ang na record nga kaso sang COVID-19.
Sa interview sang Bombo Radyo kay Salfin, iya ginpahayag nga kalabanan sa mga naga-istar sa ila lugar ang nagatrabaho kag tuman nga naapektuhan sang lockdown.
Suno kay Salfin, ang tanan nga identified close contact sang mga COVID-19 positive ang nakuhaan naman sang swab sample kag sa subong, nagapaidalom sa quarantine.
Ginpahayag ni Salfin nga apisar mabudlay para sa tanan ang ginapatuman nga lockdown, wala sila sang may mahimo kundi magsunod.
Nahibalu-an nga nag-umpisa ang total lockdown sa nasambit nga barangay sang Setyembre 22.
