ALBANIA – Wala pa nahibalu-an kun tubtub san-o ipatuman ang lockdown sa Albania.
Suno kay Bombo International Correspondent Cezan Kristal Malangin, infinite lockdown ang ginapatuman sa Albania kun sa diin sirado ang commercial establishments magluwas lang sa grocery stores.
Ginpauntat man ang byahe sang pampubliko kag pribado nga mga salakyan kag ang ginapahanugutan lang nga makabyahe amo ang mga may yara sang quarantine pass nga limitado lamang para sa pagpamalaklon.
Suno kay Malangin, ang kada pamilya ang ginahatagan sang isa lang ka quarantine pass agud makabakal sang kinahanglanon sa sulod sang 90 ka minutos sa shopping hours nga 5:00AM tubtub 1:00PM apang sa masunod nga semana, mahimo nga may yara sang adjustment nga ipatuman.
Ginpahayag ni Malangin nga ang mga madakpan nga nagalapas sa curfew hours ang magabayad sang multa nga 10,000 Albanian Lek ukon kapin sa P5, 000 samtang mahimo nga indi na maka-apply ukon maka renew sang lisensya ang mga madakpan nga nagabyahe nga wala sang quarantine pass.
Magluwas diri, may yara man sang pagsulundan nga bawion ang igahatag nga benepisyo sa tion nga madakpan nga nagalapas sa curfew ang mga senior citizen.
Sa pagkamatuod suno kay Malangin, gilayon nga ginpatuman ang lockdown sa Albania pila ka adlaw matapos na record ang pinaka-una nga kaso sang Coronavirus Disease 2019 (COVID-19) agud nga mahagan-hagan ang posible epekto sang virus.
Ginakahangaw-an sang gobyerno nga indi matapna ang pandemic ilabi na nga indi pa tuman ka ‘high tech’ ang hospital equipment sa Albania.
Baliskad diri sa Pilipinas, wala sang diskriminasyon sa frontliners sa Albania kag sa baylo, ang mga dumuluong ang naka-ekspryensya sang diskriminasyon ilabi na kun yara sa pampubliko nga lugar.
Sa subong, may yara sang ginahatag nga bulig ang gobyerno sang Albania para sa mga imol kag lakip na sa mga nadulaan sang trabaho.
