ILOILO CITY – Nagapangayo sang bulig ang pamunuan sang Iloilo Fish Port Complex sa Iloilo City Government agud mapatuman ang mga health protocols sa tion sang ila re-opening.
Ini matapos gin-lockdown ang Iloilo Fish Port Complex matapos nagpositibo sa Coronavirus disease 2019 (COVID-19) ang duha ka nagatrabaho sa lugar sa diin isa sa ila ang napatay.
Sa exclusive interview sang Bombo Radyo kay Mr. Jeck Conlu, pinuno sang Public Safety and Transportation Management Office (PSTMO), iya ginpahayag nga may ginhatag naman nga mga pagsulundan agud macontrol ang nga tawo nga nagagwa kag nagasulod sa Iloilo Fish Port Complex.
Suno kay Conlu, nakahanda man sila nga magbulig agud ma control ang mga tawo sa diin may ihatag nga indentification card (ID) kag visitor’s pass.
Samtang sa interview naman sang Bombo Radyo kay Engineer Reynaldo Calayag, Officer in Charge sang Iloilo Fish Port Complex, iya ginpahayag nga limitado lang ang ila personnel nga magabantay sa lugar agud mapatuman ang health protocols.
Suno kay Calayag, naka istorya naman sila sa mga brokers kag nagpasalig man ang mga ini magsunod sa ginapapanaog nga mando sang Iloilo Fish Port Complex.
Nahibaluan nga nagmando si Iloilo City Mayor Jerry Treñas nga palawigon anay ang lockdown sa Iloilo Fish Port Complex sang 3 ka adlaw matapos nagdangat sa 26 ang panibag-o nga kaso sang COVID-19 sa lugar.
