MALAYSIA – Gin-anunsyo ni Malaysian Prime Minister Muhyiddin Yassin nga palawigon pa ang ginpatuman nila nga lockdown sa pungsod nga natalana kun tani nga matapos sa Marso 31.
Ginpahayag sang prime minister nga kinahanglan sang Malaysia ang nasambit nga extension agud matapos na ang paglapta sang Coronavirus Disease 2019.
Nahibaluan nga base sa pinaka ulihi nga data, naglab-ot na sa 1,624 ang kumpirmado nga kaso sang COVID-19 sa Malaysia kag ini ang pinaka dako nga numero sa bilog nga Southeast Asia.
Gin-ako naman ni Yassin nga indi mangin mahapos ang nasambit nga extension para sa ila nga mga pumuluyo.
Madumduman nga ginpatuman ang partial lockdown sa Malaysia sang gintalikdan nga Marso 18 sa diin hugot nga ginadumilian ang pagpatigayon sang mga dalagko nga events
Mahimo lang nga makagwa ang mga Malaysians sa ila nga balay kun magbakal sang pagkaon ukon magpadulong sa ospital agud magpa check up.
Ang sino man nga madakpan nga nagalapas sa nasambit nga mandu ang posible magapangatubang sang tubtob 6 ka bulan nga pagkapreso kag kinahanglan nga magbayad sang pyansa.
