NEPAL – Indi pa masigurado kun kutub sa Abril 30 lang ang ginapatuman nga lockdown sa Nepal bangud sa Coronavirus Disease 2019 (COVID-19).
Suno kay Bombo International Correspondent Engr. Jese Mar Gallarde, sang Pebrero 7 pa siya nag-abot sa Nepal para sa isa ka advocacy project apang naabutan siya sang lockdown.
Ginpahayag ni Gallarde nga duha na lang sila nga Filipino ang nabilin sa hotel nga ila ginatiniran kag duha lang ka beses sa isa ka semana sila nagaguwa agud magpamalaklon.
Bangud sa lockdown, ginpauntat naman ang byahe, ginpasirado ang mga commercial establishment kag sa baylo, may yara sang rolling store nga nagalibot.
Sang nagligad nga Abril 13, ginsaulog sang Nepalis ang New Year apang indi lang kasubong sa kinaandan nga may madamu nga aktibidad.
Sa mga dalan, madamo ang nagabantay nga pulis nga may bitbit nga stick nga kasubong nga inug bakol sa mga wala nagasunod sa quarantine.
Sa pagsulod naman sa grocery stores, hugot nga ginapatuman ang physical distancing, pagsuksok sang facemask, temperature checking kag One Entrance, One Exit Policy.
Sa subong suno sa natungdan, wala pa sang kasiguraduhan kun san-o sila makapauli diri sa Pilipinas.
