ILOILO – Palawigon pa ang pagpasirado sa Municipal Health Center sang Oton, Iloilo.
Ini matapos naggwa na ang reverse transcription polymerase chain reaction (RT-PCR) test sang isa ka midwife subong nga adlaw, Setyembre 9, kag nagpositibo ini sa coronavirus disease 2019 (COVID-19).
Ang nasambit nga COVID-19 positive nga midwife ang naka-close contact sa iya infected nga anak, kag subong, infected man sa virus ang iya nga bana.
Sa interview sang Bombo Radyo kay Jafet Salinas, focal person for COVID-19 sa nasambit nga banwa, iya ginpahayag nga yara na subong sa quarantine facility ang nasambit nga midwife kag santo sa ila pagpangusisa kahapon, nadulaan ini sang sense of smell kag may iban pa nga ginabatyag sa lawas.
Ginapatigayon man ang contact tracing apang nagpasalig ang natungdan nga kun yara ang midwife nagaduty sa health center sang una, kompleto man ini sa personal protective equipment (PPE).
Nahibaluan nga magabalik na kuntani sa normal operation ang health center bwas, Setyembre 10, apang bangud sa patigayunon nga disinfection, buksan ini sa publiko sa Lunes, Setyembre 14.
Suspendido anay ang consultation kag laboratory services apang magapabilin ang ambulance services.
Sa subong, ang Oton ang may ara sang 15 ka active cases sang COVID-19 kag lunsay napaidalom sa facility quarantine ang mga pasyente. #
