ILOILO CITY – Ginpalawig tubtub sa Agosto 9 ang lockdown sa Passi City Hall samtang buksan naman epektibo buwas nga adlaw, Agosto 7, ang Passi City Public Market.
Sa interview sang Bombo Radyo kay Passi City Mayor Stephen Palmares, iya ginpahayag nga ang pagpalawig sang lockdown sa city hall ang nag-ugat sa pagpositibo sa COVID-19 sang isa ka nurse nga nagpadulong sa simbahan kun sa diin may mga residente sang component city nga nakatambong man sa religious activity.
Suno kay Palmares, ang nurse ang indi tumandok sang Passi City kag nagatrabaho sa syudad sang Iloilo apang nagsimba sa simbahan sa Passi City.
Ginpahayag ni Palmares nga nagpakuha sang swab sample para sa COVID-19 ang nasambit nga nurse bilang kabahin sang regular test sa mga medical frontliners.
Naglab-ot sa 38 ang naka-close contact sa nurse kun sa diin lakip na diri ang duha ka empleyado sang Passi City Government kag bangud sini, palawigon ang lockdown sa munisipyo agud hatagan-ligwa ang pagpaninlo.
May kaangtanan diri, ginaduso man sang alkalde nga ipakansela anay ang tanan nga misa nasambit nga component city bilang kabahin sang precautionary measure.
Ginalauman nga sa Agosto 10, magaguwa na ang resulta sang confirmatory test sang duha ka empleyado sang Passi City Government.
